საქართველოს გარემოს დაცვისა და სოფლის მეურნეობის სამინისტრო

14 ივნისი 2018 | „გარემოსდაცვითი პასუხისმგებლობის შესახებ“ კანონპროექტის განხილვა

გარემოს დაცვისა და სოფლის მეურნეობის სამინისტროში „გარემოსდაცვითი პასუხისმგებლობის შესახებ“ კანონპროექტის საჯარო განხილვა გაიმართა.


კანონპროექტის საჯარო განხილვას გარემოს დაცვისა და სოფლის მეურნეობის მინისტრის მოვალეობის შემსრულებელი ლევან დავითაშვილი უძღვებოდა.


ლევან დავითაშვილის განცხადებით, აღნიშნული კანონპროექტის შემუშავება, ერთი მხრივ, განპირობებულია საქართველოსა და ევროკავშირს შორის ასოცირების შესახებ შეთანხმების ვალდებულებით, ხოლო მეორე მხრივ, სახელმწიფოს მიდგომით ქვეყანაში დაინერგოს მაღალი გარემოსდაცვითი პასუხისმგებლობისთვის ეფექტიანი სისტემა. ახალმა კანონმა გარემოზე ნებისმიერი სახის ზიანის მიყენების პრევენციისა და შერბილების/აღმოფხვრის სამართლებრივი რეგულირება „დამაბინძურებელი იხდის“ პრინციპის შესაბამისად უნდა მოახდინოს, რაც გულისხმობს გარემოს დაზიანების შემთხვევაში, მის აღსადგენად საჭირო ღონისძიებების განხორციელებას საქმიანობის განმახორციელებელი სუბიექტის სახსრებით. 


ლევან დავითაშვილმა ხაზგასმით აღნიშნა, რომ გადაუდებელ აუცილებლობას წარმოადგენს საზოგადოებაში მკაცრი გარემოსდაცვითი პრინციპის დანერგვა, შემაკავებელი ეფექტის მქონე ფინანსური სანქციების დაწესება და ზიანის პრევენციის მექანიზმების ამოქმედება.


კანონპროექტის საჯარო განხილვას მინისტრის მოადგილე ნინო თანდილაშვილი, სამინისტროს სისტემაში შემავალი დარგობრივი უწყებების, საქართველოს პარლამენტის გარემოს დაცვისა და ბუნებრივი რესურსების კომიტეტის და არასამთავრობო ორგანიზაციების წარმომადგენლები ესწრებოდნენ.

 

 

პარტნიორები